جدول تنظيف المنزل قبل العيد

[ندعوك للتسجيل في المنتدى أو التعريف بنفسك لمعاينة هذه الصورة]

بسم الله الرحمن الرحيم
يا رب بارك في وقتنا وصحتنا وبيتنا وزوجنا واولادنا واجعل كل شيء بنعمله في ميزان حسناتنا
اخيرا هقولوكوا على الجدول باختصار ونرغي بئه كل يوم بيومه
15\11 المطبخ: تنظيف وترتيب تلتين دواليب المطبخ ورشها اي كراكيب ارميها اي حاجة مش مستخدمة خزنيها علشان ما تعملش زحمة وخلي كل درفة لحاجة معينة مثلا الحلل واخرى كاسات وكبايات للضيوف علشان منروحش نجيب من النيش والناس قاعده و اخرى للمشروبات فقط واخرى للخلاط فقط و ما تنسوش تشيلوا فيشة التلاجة قبل النوم وتشيلو سجادة المطبخ علشان مية التلاجة وانقعي السجادة في البانيو مع اريال
16\11 المطبخ: التلت الاخر من الدواليب لكن الاجزاء المفتوحة لا علشان هتترب لما ننفض شباك المطبخ والمطبخ من فوق والتلاجة وغسيل سجادة المطبخ وما تنسيش بالليك تنقعي كل عيون البوتاجاز والشيالات لو قدرتي في خل وكلور
17 \11 كنس التراب اللي فوق دواليب المطبخ ومسحها بفوطة مبلولة ثم تنفيض الشباك ثم تلميع السيراميك والخشب والشفاط و كل ما تراه عينيك في المطبخ وما تنسيش تغلفي مواسير الغاز بالفويل وكده نبقى خلصنا المطبخ الحمد لله
18\11 الحمامات : اول حاجة تنفيض الشباك كل شيء يتغسل كل شيء والسيراميك وادعكي اي اماكن سودا بماء النار بس مع الحرص ورتبيه بشكل جمالي حطي لمساتك الحمام مهم جدا وخلي الفوط كلها في الحمام ولملمي حاجاتك وماسكاتك المبعترة في علبة واحدة او سبت خوص او او ............. دوري عندك هتلاقي حاجات انت ركناها مع انك ممكن تستفيدي منها جدا وهبقى اقولوكوا انا عاملة ايه في الحمام
19\11 الدواليب اكيد مترتبة علشان تطليع الشتوي كان قريب انا عن نفسي لسة ما طللعتوش عايزن الهدوم متكونش كتير على الفاضي اللي مش بيستعمل ابعديه في ضرفة عالية او خزنيه بس يكون قريب لما تحتاجه وحطوا مسك في الدولاب علشان الريحة الجميلة والطرح حلو اوي برمها في الدرج وربطها بدبوس او اكتر علشان مش تفك ودرج الميكب ودرج التوك ممكن تحطي فيهم البلاستيك بتاع تقسيم المعالق علشلن تلاقي الحاجة بسهوله بس خلوا بالكم ماتشتروش قبل ما تتاكدوا من المقاس و ممكن كمان اي علب تلاجة صغيرو وممكن اطباق فل او بلاستيك بتاعة اعياد الميلاد او حتى بتاعة الجبنة الرومي
20\11 غرفة النوم:نشيل الستارة وننفضها ونحطها في الغساله على البارد ولما نخلص نعلقها انا عن نفسي مش بتحتاج عندي اني انشرها تنظيف الغرفة وطبعا التنفيض والتزعييف الاول وبعدين غسل الحيطان اللي محتاجة بس و المسح والتلميع واساسي نلمع الخشب والاويما و السجادة نعملها بفرشه وديتول مخفف
21\11 تنظيف وترتيب البوفيه والنيش من الداخل الاطباق والكاسات المركونة في البوفيه ممكن تمسحيها بفوطة نضيفة من التراب وممكن تغسليها لو عايزة والنيش انا بجيب طبق كبير فيه ماء وخل واضع الكاسات واحد واحد كاني بغسله وجرنان تقيل على البوفيه او ترابيزة السفرة واقلبهم عليه واحد واحد والمع النيش ولما ينشفوا بيكونو نضاف وممكن انا انشفهم لو خلصت التلميع وهما فيهم ميه بس بقماش خالي من الوبر ولو في دواليب او مكتبة في غرف اخرى نعملها
22\11 تنظيف باقي الغرف بنفس طريقة غرفة النوم اول حاجة نحط الستارة في الغسالة على البارد علشان نعلقها على نضافة
23\11 تنظيف الريسبشن:اول حاجة الستائر اكيد حفظنا و بعدين التنفيض والنجف وبعد كده المسح والتلميع و الخشب وحولوا تغيروا دايما في اي حاجة بتنضفوها علشان التغيير في اماكن الاشياء بيديكي احساس اكتر بالراحة والنضافة
يارب الجدول يكون مناسب ليكم جميعا ونبدا فيه مع بعض وربنا يعينا وما تنسوش سبحان الله 33 مرة والحمد لله 33 مرة والله اكبر33 مرة قبل النوم خير لك من خادم

[ندعوك للتسجيل في المنتدى أو التعريف بنفسك لمعاينة هذه الصورة]

نفسى أسأل سؤال
ليه الستات بتنظف أكثر فى ايام العيد
مع أن التنظيف يوميا شغال

أحنا بنتخنق من النظافة دى

سؤالك يا استاذ مجدى يسئله كل راجل مصرى
بس هيا عادة المصرين توارثوها
ولا يفكر احد ان كانت ثواب او خطا

جدول جميل اوى روز وبتسهلى على ناس كتير اوى اللى يعملوه بس انا للاسف عندى عاده سيئه جدا انى بقوم انضف البيت كله فى يوم واحد معرفش انام وفيه حاجه لسه مخلصتش وده طبعا بيهلك صحتى وبنام بعدها اسبوع بس عاده مش عارفه ابطلها بش شكرا لمجهودك وعيد سعيد كل سنه وانتى طيبه

» طلبات المنزل
» طريقه عمل الخبز البلدى والفينو فى المنزل
» طريقة تنظيف السمك
» سلسلة تنظيف الجهاز
» طرق تنظيف اواني المطبخ