المواطن بلال فضل: أيوه أنا عارفها الغنوة دى مش دى بتاعة، كنا فى زنقة وعوزة وخنقة وديوننا تكتيفة وشنقة، رسم الخطة محطة محطة، خد نصها والباقى وراه، بس الصراحة أنا ما أعرفش طلعت فى أي عصر، عشان أنا العصر باقيل شوية عشان أنزل أشتغل فى القهوة بالليل
ـ لماذا يطلق على مترو الأنفاق اسم الهرم الرابع؟
ـ والله أنا باسمع عن موضوع المترو ده بس عمرى ماركبته عشان باسمع إن التذكرة بتاعته بجنيه، وأنا أمى حلفت عليا لو ركبت مواصلة بأكتر من نص جنيه هتدعى عليا ساعة السحور إن ربنا يفقرنى ويغور النعمة من وشى، بس يعنى يمكن سموه الهرم الرابع عشان فيه سلالم كتير زى الهرم
ـ من صاحب كتاب الموتى؟ ولماذا أسماه بهذا الاسم؟
ـ أيوه عارفه عم بسيونى اللى ماسك مكتب الصحة عشان هو اللى مطلع شهادة الوفاة بتاعت أشرف وقيده فى الكتاب بتاع الموتى، هو بيسميه دفتر، بس زى بعضه، أنا ماشى بشهادة الوفاة فى البطاقة عشان لو أشرف طلع عليه نصيبة ما ألبسهاش أنا.
*******ـ ما هو الـ
D.N.A
وما هو تحليله؟ وفيم يستخدم؟
ـ الدى إن إى ده ولا مؤاخذة بيعملوه للناس اللى عندها دناوة، اللى هى لا مؤاخذة بتاخد البنات«الفيرجل» اللى هم يعنى بنات بنوت، وياخدوهم الأتوبيس المكيف أو يطلعوا بيهم «المقطّم» ويغنوا لهم أغانى قبيحة، زى بتاعة أكبر حاجة باحبها فيكى هى دى، وبعدين يخلوا البت تفرط فى شرفها، وبعد كده يخلعوا منها، والبت تحبل ومايبقاش عندها فلوس تنزل العيل والعياذ بالله، فتنطرّ تسيح لروحها وتحلل البتاعة اللى قلتى عليه ده، عشان الشاب الدنى اللى خلى بيها يصلح غلطته ويكتب عليها وابنها تطلع له شهادة ميلاد عشان يتطعم زى ما الست سوزان مبارك الله يبارك لها بتقول
ـ ما هو ارتفاع برج القاهرة؟ـ مش عارف بس لو قلنا إن الداكتور أحمد نزيف يقطع بتاع مترين، فالبرج ممكن يبقى طوله زى تمانين أحمد نزيف بالصلاة ع النبى
ـ كم عدد أحجار الهرم الأكبر؟ـ معلهش أنا عمرى مارحته، باتفرج عليه فى الغنوة بتاعة الست وردة والحاج محمود ياسين، عارفه الغنوة دى، اللى الست وردة بتغنى ويطلع الحاج محمود يقول لها كلام بالنحوى، بس عهد مين ده، لو خدتينى أنا والولية والعيال وظبطتونا، يعنى غدا ومشاريب، وركبتونا التوك توك اللى هو بتاع السياحة ده اللى بيوقفوه تحت الهرم، علىّ الطلاق ما أروحهم إلا لما يعدوه لسيادتك حجر حجر. طالما الموضوع ده فارق معاكى يعنى
*******ـ اذكر أسماء أصابع الإنسان؟
ـ الصباع اللى بتعمل بيه أوكيه بعد مابتكسب جنيه دهب فى البرنامج بتاع طارق باشا علام، والصباع اللى بتلعب بيه فى مناخيرك لما المواصلات بتبقى واقفة، والصباع اللى بنلقح فيه الدبلة، والصباع الصغير اللى بتنضف بيه ودانك
ـ المذيعة من غير الكاميرا: إيه القرف ده؟ (تخبط على صدرها بيديها متغاظة) شيل لى كل ده فى المونتاج ياعزت؟
ـ هو عزت هيشيل إيه بالضبط؟ مش حرام؟، ده إنتى كده زى القمر
ـ إنت بتتكلم عن إيه؟
ـ أصل أنا أسمع إن الستات الأغنياء اللى زى سعادتك يعنى، ربنا يزيدك، بيشيلوا حاجات وكده يعنى، فباقول إنتى كده تمام، ده إنتى لو دخلتى عندنا المنطقة مش هتطلعى منها، بس إنتى هتدخليها إزاى، إذا كانت المية مادخلتهاش هتدخليها إنتى؟
ـ السؤال اللى بعده، ما هو الفرق بين محور أكتوبر ومحور الشر؟
ـ محور الشر ممكن تلاقيه رايق، إنما محور أكتوبر لا يمكن تلاقيه رايق أبدا
ـ برافو عليك، إنت طلعت عارف محور الشر؟
ـ أمال، مش قصدك الدائرى؟ أصل بتوع الميكروباصات بيطلعوا منه لما بيبقى فى كمين ع المحور
ـ وهم إزاى بيعرفوا إن فى كمين، وهو كمين؟
ـ ما هو الكمين عندنا لازم يفضل فى المكان بتاعه على طول، عشان فيه رزق للناس اللى واقفة عليه
*******ـ أنا مش فاهمه حاجة، المهم قول لى، لو لم تكن مصريا لوددت أن تكون إيه بالظبط؟
ـ بصراحة طول عمرى نفسى آخد شقة فى العمرانية الغربية، قريبة من كل حتة، وممكن تروحيها مشى من ميدان الجيزة، وبيقولوا إن المجارى دخلتها، بس مش متأكد خرجت منها ولا لسه فيها
ـ أنا أقصد ممكن تسيب مصر وتروح بلد تانية؟ ـ ليه يعنى، وهىّ مصر أذتنى فى حاجة، أنا الحمد لله ماشفتش منها حاجة لا وحشة ولا حلوة
ـ طب تقدر تقول لى فى جملة واحدة مصر بتمثلك إيه؟ـ مصر معزتها من معزّة أشرف الله يرحمه
*******-بــلال فضــل-
[ندعوك للتسجيل في المنتدى أو التعريف بنفسك لمعاينة هذه الصورة] الشرقاوي 
موضوع: حوار مع مواطن مطحون 
الثلاثاء 16 فبراير 2010, 12:40 pm
