فن معاملة الاخرين (الضيوف

السلام عليكم ورحمة الله....

الكلمة الرقيقة......الابتسامة....الحركة ..الاصوات المنخفضة....حُسن معاملة الاخر..وحسن استقباله...ترتيب المائدة...الملابس...


كل هذه الاشياء تمثل جزء كبير من شخصيتنا..ومن خلالها يتم التعرف على طبيعة الشخص الذى نتعامل معه ....

وعلى الرغم من الايقاع السريع للحياة ..وبالرغم من ان ماحدش عنده وقت للاتيكيت ده ...وبالرغم من كتير من قيمنا اتغيرت وظهرت على السطح سلوكيات اخرى ...خلينا نقول انها ابسط واقل تعقيدا ..وخليها على الله ..الا ان فيه ثوابت لا يمكن ان نتغاضى عنها...

لانها تمثل الخطوط العريضة التى تعبر عن اسلوب تعاملنا مع الاخر...وتعبر عن طبيعة شخصياتنا ومدى تأثيرنا وتأثرنا بالوسط المحيط بنا...

والاتيكيت وفن معاملة الاخر من القيم الجميلة التى تضيف لحياتنا لمسة حضارية ...راقية...يجب غرسها فى نفوس اطفالنا منذ الصغر....

تعالوا مع بعض نشوف ابسط طرق فن معاملة الناس المحيطة بنا.....

نبدأ باستقبال الضيوف.....


مين منا راح فى زيارة ناس تانية وخرج من غير مايتكلم عن طريقة استقبال اهل المنزل له ...؟

ده لازم يحصل ...والسيدات حتفهم كلامى ده اكتر...

طيب ماتيجوا نتعرف على ابسط قواعد استقبال الضيوف ....

المثل الشعبى بيقول " لاقينى ..ولا تغدينى "...

يعنى قابلنى كويس ومش عايز منك اكل ولا شرب ....

يبقى نمرةواحد.....*** استقبال الضيوف ببشاشة وابتسامة مرحبة ***

لان الانطباع الاول هو اللى بيسيطر على مجريات الزيارة بعد كده ...

*** ممنوع فتح باب الشقة او استقبال الضيوف وانت لابسة هدوم البيت او الشبشب..والكلام للرجل ايضا ....***

يعنى لازم تكونى جاهزة لاستقبالهم ...الا فى حالة استقبالك للمقربين جدا ..جدا ..او لو حد جه من غير ميعاد ..

*** افتحى باب الشقة بنفسك .***

لان ده بيعطى انطباع بمدى اهميتهم عندك ويسعدهم ...خصوصا برضه لو فيه ميعاد سابق....

**** لا داعى للقبلات الزائدة...***

يعنى المعقول ..ويكفى انك توصلى رسالة بمدى اعتزازك وحبك عن طريق قبلتين وكفاية كده ...

*** ادعى الضيوف للجلوس ...لان الطبيعى ان الانسان المهذب مش حيقعد الا اذا دُعى لذلك***

***اهتمى بنظافة منزلك ..وحمامك قبل وصول الضيوف بفترة كافية ***


*** اذا كنت انت الزائرة او الزائر واستخدمت الحمام ...فراعى ان تتركيه نظيفا ***

***اذا قمت بدعوة عدد كبير من الناس ...فيجب مراعاة ان يكونوا منسجمين معا ومن نوعية غير متنافرة حتى لا تحدث مشادات اثناء الزيارة ***

***اهتم او اهتمى بالاصغاء للاخرين اثناء حديثهم ولا تحاول قطع الحديث لتفرض رأيك ***

*** لا داعى للمزاح الثقيل والذى يسبب احراج للطرف الاخر ***

***تجنب دعوة صديقك ان كان غير متزوج مع مجموعة من المتزوجين ****


*** من كرم الضيافة تقديم شاى او قهوة وبعض الحلويات ..او عشاء خفيف ان كانت زيارة عادية ...***


تعلم ان تفتح بابك للاصدقاء والاقارب من وقت لاخر..ولا تتحجج بان نفسيتك تعبانة ومش فى مود يسمح باستقبال احد ..لان هذا امر يخصك وحدك وماحدش له ذنب فيه ...ولتعلم ان الفرح معدى..والضحك معدى..فان كنت حزينا ...اندمج مع الاصدقاء حتى تغير من الجو الكئيب المحيط بك ...

***اذا تسببت فىى احراج احد ...فلتعتذر على الفور ***


***الرجل يجب ان يقف عن مصافحة السيدة ..وان يقف ايضا عندما تقدم له ربة المنزل الشاى او القهوة ***


***اذا كان عندك ضيوف ..ماتسأليش:تشربوا قهوة؟..ولا شاى؟...لان الجواب حيكون ولا حاجة خالص خليك مستريحة **

قدمى اللى انت ناوية تقديمه واللى مش عايز تشوفى طلبه ايه ..

ولو ان انا من رائى انك تجهزى اكتر من حاجة ..يعنى غلاية مياه سخنة وبواكى شاى ونسيكافية وكابيتشنو..مع العصائر ..واللى عايز حاجة تقديمها له ...خصوصا لو فيه ميعاد للزيارة

وبعد مايشربوا اى حاجة ..اعرضى عليهم تانى اذا يحبوا يشربوا شىء اخر...

***بعد تناول الطعام..يفضل الانتقال الى غرفة الصالون لتناول القهوة او الشاى ***

*** لا تحاولى ان تظهرى امام ضيوفك فى مستوى أعلى من مستواك او مستواهم ...فذلك سوف يسىء اليك ***

***لا تتركى طفلك للجلوس على رجل احد الضيوف..ولا يشده من انفه ولا الحركات دى****

ونفس الشىء ينطبق على القطة.......


واخيرا ..الابتسامة...الابتسامة والصوت المنخفض هما مفتاح العلاقات الحسنة ........


والى اللقاء ...على المائـــــــــــــــــــــــــــــــــــــدة...

تعالوا نتكلم بقى عن الاتيكيت فى المناسبات العامة بصفة عامة ...

***بالنسبة للورود..طبعا لها دائما وقع جميل ومؤثر جدا لانها رمز المشاعر الرقيقة والذى منه ....
.....بالنسبة للورد البلدى...نرسل منه عدد فردى...3 او 5...او 15 ..كده يعنى ****

***تجنب ارسال الورد الاحمر...لانه للناس الحبيبة فقط ***

***لو حفلة خطوبة...يبقى نرسل ورد ابيض ومعاه ورد روز (بمبى) مع بطاقة تهنئة***

***لو عندك عزومة فى بيتك..زين المكان بالورد ..بس مش كتير..مع مراعاة عدم الاكثارمنه على مائدة الطعام...وراعى ان يكون فى اناء منخفض حتى يتيح الفرصة للمدعون انهم يشوفوا بعض وهم على مائدة الطعام***

***اذا احضر لك احد الاصدقاء حلوى او تورتة ..لازم تقدم منها لهم فى الحال***

***عند زيارة المريض..تجنب ان تكون ضيفا ثقيلا...يعنى يابخت من زار وخفف زى مابيقولوا..ولا تصطحب معك اطفال..وراعى حديثك معه ..يعنى ماتقولش مثلا ..ده فلان كان عنده نفس المرض بس ربنا رحمه بقى***

اجعل حديثك ودودا ...وبالنسبة لهدايا المريض زى مانانو قالت كده بالظبط...
وان كنت افضل عدم اخذ هدايا اذا كان فى المستشفى ..ولما يخرج يبقى تقدم له هدايا عند الزيارة فى المنزل ...اولا لو ورد..ماينفعش يفضل مع المريض فى نفس الغرفة علشان الاكسجين....ولو حلويات ...مين حياكلها بقى ...
ممكن لعبة لو طفل ..او كتاب لو المريض يستطيع القراءة.
عند التهنئة بمولود جديد....

***الزيارة ضرورية بالنسبة لافراد الاسرة والمقربين مع تقديم هدية للمولود..اما لعبة دهب...اوشىء من مستلزمات المولود...او هدية للام ..او ورود لو حد غريب ..(علشان ماحدش يقول ماهو مش مجاملنى فى حاجة****

***اختيار موعد مناسب للزيارة***

***عدم تقديم النصح والارشاد للام الا اذا طلبت ***

***يفضل تواجد الام بمفردها فى الغرفة اذا كانت تتوقع زيارات عديدة***
**خصوصا عند تقديم الهدايا لها ..مهم جدا ان اللى معاها فى الحجرة ينسحبوا للخارج..يعنى زوجها او والدتها او اخواتها *****


أعياد الميلاد...

***لاتتعمدى الاعلان عن حفلات عيد الميلاد حتى لاتتسببى فى احراج احد***
***بالنسبة لاعياد ميلاد الاخرين...تختار هدية مناسبة ...نافعة....معتدلة الثمن ..رمزية***

***لو عيد ميلاد احد من اصدقاء الاولاد ..معروف طبعا اننا بنوصلهم ونمشى ..***
***اذا كنت مدعو ..يجب المحافظة على دقة المواعيد..ولو حدث تأخي يجب الاعتذار عنه***

***يجب رد الدعوة فى خلال شهرين من دعوتك وليس بعد عام مثلا****

***بعد الزيارة يجب توجيه الشكر لربة المنزل والاثناء على حسن استقبالها وطبيخها ...بس خلى بالكم ..الزوجة هى اللى تثنى على ست البيت مش الرجل ..منعا للمشاكل ..واضح طبعا ****

*** لاتصحب معك اى شخص غير مدعو ....وحتى فى الافراح لا تصطحب معك اولادك الااذا وجهت لهم الدعوة***

***وانت فى منزل من دعاك ...لابد من الاستئذان قبل التدخين ..وقبل فتح او غلق نافذة ..وقبل استخدام التليفون...وقبل دخول الحمام ...وقبل الاطلاع على كتاب فى المكتبة ****

***التطفل وحب الاستطلاع منافى للذوق والاتيكيت...فلا تنظر بعين متفحصة الى حجرات الشقة...ولا تطيل النظر فى الصور العائلية او التابلوهات ***

***لا تكن ضيفا ثقيلا ولا تنتظر حتى ترى المضيف وهو يحاول اخفاء تثاؤبه..***

***لاتذهب لزيارة احد دون ميعاد سابق ...***

يعنى بلاش كلمة اصلى كنت معدى من هنا وقلت اجى اسلم...ولا اصلى قلت نعمل لكم مفاجأة كده يعنى...ممكن مكالمة تليفونية تعملها قبل الزيارة

***لا تنظر لساعتك او لساعة الحائط باستمرا اذا عندك ضيوف ***

***اذا كنت مع اصدقائك خارج المنزل لتناول العشاء او الغداء..يجب ان تصر على المشاركة فى الحساب..الا اذ1ا كنت معزوم***

***لا تتهرب اثناء الدفع وتقوم تدخل الحمام***

***لا تدقق فى الفاتورة لتحديد قيمة نصيب كل فرد***

***اذا كنت مدعو..فلا تشكر من دعاك على الفور..ولكن انتظر بعد الخروج من المطعم لتشكره...بطريقة بسيطة غير مبالغ فيها****


***عند تقديم واجب العزاء..لايجوز ابدا العزاء عن طريق التليفون...وليكن مظهرك بسيطا وتمتنع السيدات عن لبس المجوهرات****

.

المائـــــــــــــــدة


الكلام عن اتيكيت الموائد كثير جدا..بيتناول عدة جوانب ....بدايةً يجب ان نعرف ان آداب المائدة لا يقتصر على تنسيقها بطريقة تفتح الشهية ..او يقتصر على ترتيب الاطباق والشوكة وولسكين وكيفية استخدامهم ...انما يمتد الى التصرفات البسيطة والسلوكيات الواجب اتباعها ...


***اذا سقطت قطعة طعام على المفرش ..يجب التقاطها فى هدوء وعدم وضعها فى الفم ..بل يتم وضعها على الطبق***

***اذا سقط بعض الملح يجب تركه كما هو..اما فى حالة العصير او الماء لا يجب اخفاء هذا بوضع طبق فوقه...ولكن نعتذر ببساطة ولباقة****

***اذا سقطت احدى أدوات المائدة زى الشوكة او السكين..لايجب التقاطها .خصوصا فى المطاعم او اذا كان هناك من يقوم بالخدمة...واطلب غيرها ....اما اذا كانت لاتوجد خادمة ..فالتقطها بهدوء واطلب غيرها من ربة المنزل...ولا تستخدم مرة اخرى***

***اذا سقطت فوطة..يجب التقاطها***

***اذا وجدت حصوة فى الطعام..فلا تقوم باثارة ضجة من حولك..لان ذلك سوف يحرج اصحاب البيت...بل تخلص منها بهدوء ولباقة..كأن تضعها فى منديل ورق مثلا****


***عدم التمخض بصوت مرتفع***

***الجلوس الى المائدة لايتم الا بعد دعوتك الى ذلك..واذا كنت انت المضيف عليك ان توجه الدعوة لضيوفك للتوجه لى المائدة***

***يمكن وضع اليدين على اطراف المائدة..ولكن يجب عدم وضع الكوعين ابدا***

***اذا اضطرت ربة المنزل للقيام لتلبية اى طلب...فيجب على الرجل ان يهم بالوقوف احتراما لها***


انا سامعة ناس بتقول ياااااااااسلالالالالام...
ايوه هو ده الاتيكيت...


***من العادات السيئة قضم الخبز قبل ان يأتى الطعام ...لاتفعل ذلك ابدا حتى لو كنت جعان****

***لا تملأ فمك بلطعام ..ولا تصدر اصواتا اثناء المضغ***

***لا تتكلم أو والطعام فى فمك***

***عدم احداث صوت ثناء تناول الشوربة والافضل شربها بجانب الملعقة***


***عدم اثارة موضوعات خاصة تستدعى مناقشات حامية اثناء تناول الطعام****

***تجنب الحديث عن الموتى والاخبار الحزينة ***


*** لايصح ان تتحدث ربة المنزل عن المجهود الهائل اللى بذلته فى اعداد الطعام ..وبالتالى تكلفته**

***لاتتوقف ربة المنزل عن الطعام قبل ضيوفها***

***عدم اظهار الاستياء اذا كسر احد الضيوف شيئا ..حتى لو كان غالى الثمن ***


وتكملة لكلام وجدى...لحد مايصحى من النوم...

** عند تقديم المأكولات البحرية التى تؤكل بالاصابع ..مثل الكابوريا..يفضل وضع طبق غويط صغير به بعض شرائح الليمون على شمال الطبق الرئيسى حتى يشطف الضيف فيه يديه ..وكذلك طبق للقشر بجانب الطبق الرئيسى ..ويتم رفعهم بعد الاستخدام****


***الماء..يوضع فى الزجاجات المخصصة له فى حالة الضيوف المقربين...اما المناسبات الرسمية فيجب وضعه فى الاناء الخاص به ***بس دلوقت بقى العبوات الجاهزة سهلت المهمة ...

***الملاحة...توضع اكثر من ملاحة على المائدة..***

***الشوربة تانى ياخضر....يوضع طبق الشوربة الكبير فى وسط المائدة..اما الحفلات الرسمية يفضل عدم تقديم شوربة ***

بس انا عن نفسى ..انا اللى باقوم بتقديم الشوربة وغرفها وبعد كده اشيل الطبق بتاعها...

***توضع قطعة من الخبز تحت او بداخل الفوطة المخصصة لكل ضيف او فى طبق على يسار الطبق الاساسى...يعنى على يسار واعلى الشوكة...***

***الفخدة بالارز والخلطة ..واللى دايما بتكون موجودة فى العزومات..يفضل تقطيعا على شكل شرائح وصها مرة اخرى على شكلها الاصلى قبل التقديم..او لو موجود سفرجى..يتولى هو المهمة دى ***

***بعد الانتهاء من الطعام يجب وضع الشوكة والسكين بجانب بعضهما داخل الطبق***


طريقة تناول الطعام ...


***الشوربة ياخضر...تشرب فى هدوء واذا كانت سخنة لا تنفخ فى الملعقة بل انتظر حتى تبرد ..وتجنب اصدار صوت شششووورب ده خالص....واضح (تالت مرة اهو بأكد عليك)****

***وايضا لاتحرك الشوربة وتقلبها بالملعقة لتبرد بسرعة ...وايضا لا تميل الطبق علشان تاخد اخر شوية بالملعقة ..وبالتبعية ما تشربش من السلطانية اخر شوية بدعوى انها لذيذة...ابقى اعمل كده فى البيت ****

**الارز:...يفضل تناول الارز بالشوكة وعدم استخدام الملعقة****

***المكرونة الاسباجتى...تناولها عن طريق لف خيوط المكرونة على اسنان الشوكة وعدم تقطيعا بالسكين...***

نستنتج ياجماعة كده ..ان بلاها شوربة...بلاها مكرونة اسباجتى..

***الاسماك....يفصل لحم السمكة عن الشوك ..وذلك عن طريق قطع السمكة بالطول من الرأس الى الذيل...ثم فرد اللحم على الجانبين ..بعد الانتهاء من تناول لحم السمكة ..لاتقلب ابدا على الوجه الاخر..بل انزع سلسلة الوسط بواسطة شوكة وسكينة وضعها على طرف الطبق ثم اكمل تناول باقى السمكة***

***اذا دخل شوك فى فمك ...انزعه بهدوء بواسطة اصابعك ثم ضعه على طرف الطبق ***

***الجمبرى يؤكل باليد بعد نزع الرأس والقشر..ويراعى عدم وضع الجمبرى فى الدعوات الرسمية***

***الطيور لاتبحث عن القطعة المحببة لك ولكن خذ التى امامك ***

***الزيتون...تلفظ البذرة فى اليد وهى شبه مغلقة او فى الملعقة وتوضع فى الطبق***ونفس الشىء ينطبق على الفاكهة ذات البذور او النوى

أما اذا كان العشاء رسميا فأخرج النواة من فمك الى الملعقة الخاصة بك بعد وضعها قرب الشفتين ثم الى الطبق وتتجنب استخدام يدك

***الجبنة تؤكل بالسكين وليس بالشوكة***

***لاتمسح بقايا الصلصة اللذيذة فى الطبق بلقمة عيش ..***سيبها وانساها لان ده حيدل على انك انسان شره
***لاتغمس اصبعك فى الطبق لتتذوق مابه***

**لاتلحس اصابعك لاى سبب***

***لاتشم الطعام قبل ان تأكله****

***جفف شفتيك قبل شرب الماء وبعده ***

**لا تلمس الفاكهة وتتحسسها لتتأكد من نضجها***

***لاتنتقد طعام يقدم لك***

***اذا كنت مش بتفضل اكلة ..لا تقول لا اصلى مش بحبها ...اقبلها وضعها بجانب طبقك ولا تأكل منها***

***لاتضع الفوطة حول رقبتك او تدسها فى ياقة القميص..***

**فى نهاية العشاء ضع الفوطة على المائدة زى ماهى ..ولا تثنيها مرة اخرى**

**لاتشتكى من تعب معدتك بعد الاكل..ولا تقول حاسس انى حأتقيأ***


البوفيــــــــه المفتــــــوح..


لا تطيل الوقوف امام الاطعمة وحدد سريعا انت حتاخد ايه

لا تملأالطبق على اخره ..حتى لا يتبقى شىء فى طبقك..وتذكر انه بامكانك العودة مرة اخرى لاخذ ماتريد

الجريح كتب:

ايون كده تسلم ايدك اهو الكلام ولا بلاش


شكرا لكى مدام روز

شكرا على مرورك الكلام ده يتنفذ مش قراءة عابرة نبتدى تطبيقه فى كل امور حياتنا

الله ينور عليكي يا rose
كلام جميل جدا
بس المشكلة لو نفذناه كله
حنلاقي الضيوف ده عندنا كل يوم.
موضوع أكثر من رائع .
تسلم ايدك عليه.

[ندعوك للتسجيل في المنتدى أو التعريف بنفسك لمعاينة هذه الصورة]