المقادير:
كيلو بتنجان رومى او 4 حبات
كيلو بطاطس
كيلو كوسه
كيلو لحمه مفرومه
فلفل اخضر حراق
لتر حليب
5 ملاعق دقيق
5 ملاعق زبده او سمنه
بصله كبيره
جبنه موزاريلا
معلقه صلصه
التحضير:
يقطع البتنجان دوائر ويقشر وينقع فى ماء وملح لمده ربع ساعه ثم يحمر ويوضع على مناديل ليتشرب الزيت
تقطع البطاطس دوائر او طرنشات وتحمر بس مش لدرجه الاحمرار لحد بس ما لونها يبقى ذهبى وتوضع ايضا ليتشرب الزيت منها
تقطع الكوسه وتشوح فى نقطه زيت الى ان يحمر لونها وتصفى من الزيت
ثانيا تعصيج اللحمه طريقه حلوه اوى :
نجيب حله ونحط فيها نقطع زيت وحط عليها اللحمه المفرومه ونقعد نقلبها فى الحله لحد ما لونها يتغير من الاحمر الى الرصاصى كده معناه ان الدم اللى فيها خلاص جف ومش حتبقى فيها زفاره وبعد ما لونها يتغير نبشر البصله منحطها عليها ونحط فلفل اسود وملح ومعلقه كبيره صلصه طماطم ونسيبها 5 دقايق بس وحتشمى ريحتها بنفسك روعه تفتح النفس بعدين اطفى عليها حتقوليلى هى كده لحقت تتعصج اقولك ايوه لانها اصلا استوت من اول ما حطيناها فى الحله وغيرت لونها .
بعد كده البشاميل:
نجيب حله ونحط فيها الزبده ولما تفك نحط الدقيق ونقلب ونحط اللبن مع استمرار التقليب ونحط الملح والفلفل الاسود ونقلب لحد ما يغلظ قوامه
الخطوه الاخيره :
نجيب طاجن بايركس ونحط اولا البطاطس مش البتنجان ولا الكوسه علشان ميتهروش نحط البطاطس طبقه وعليها طبقه لحمه مفرومه وفلفل اخضر حراق قطع صغيره وبعدين نحط البتنجان وعليه برضه لحمه مفرومه وبعد كده اخر طبقه الكوسه وصب عليهم فى الاخر البشاميل وعلى وشه الموزاريلا ونحطها فى الفرن لمده 10 دقايق ثم فى الشوايه دقيقتين بس تاخد لون
الف هنا
موضوع: طاجن الخضار بالبشاميل 
الخميس 24 ديسمبر 2009, 6:48 pm
