طلباتكم اوامر

اهلا بيكم
انا عملت الموضوع ده علشان اى واحده نفسها فى طبخه معينه او اى سؤال يخص المطبخ تكتبه هنا وحيتم الاجابه عليه فى اقرب وقت

اى طلبات انا تحت امركم وطلباتكم اوامر

زائر

ربنا يكرمك يا نورا

ده نظام شبيك لبيك و لا ايه
طيب انا عايزة منك تكتبي لي الكشري
بالتفصيل الممل هههههههه
علي الرغم من انه سهل
لكن ناس كتير مش بتعف تعمله حلو.في انتظار الكشري
بس يا ريت لو في الاخر طبق ساخن لو سمحتي

[ندعوك للتسجيل في المنتدى أو التعريف بنفسك لمعاينة هذه الصورة]

ايه الكرم ده كله يا نورهان
طيب طلبتنا هتردى عليها بكلام ولا عملى
طبعا احنا لازم ندوق الاول
موضوع مهم
لكى جزيل الشكر

ايه الموضوع الجميل ده يا نورهان
بس طبعا مش هتقولى الوصفه وبس لا احنا عايزين ندوق كمان ههههههه
شكرا حببتى على الموضوع
[ندعوك للتسجيل في المنتدى أو التعريف بنفسك لمعاينة هذه الصورة]

من عيونى نبض حبيبتى الكشرى حيكون عندك انهارده ان شاء الله وزى
اللى بناكله فى المحلات واحسن باذن الله
عيونى ليكى

[size=29]نور الاسلام
بحور
والله عيونى ليكم ياريتنى كنت فى مصر كنت عملتها عملى ودوقتكم من عمايا ايديا
انتوا اللى جنيتوا على نفسكم
افتكروا انكم اللى طلبتم هههههههههههههههههههه
اى حاجه عايزينها انا تحت امركم [/size]

عايزين الفول أبو قوطة
ولو ماعرفتيش
أنا اقدمه لكم
بطريقة الشيف/ مجدى البندارى

زائر

طيب يبقي اكيد عايزينه من ايد الشيف الجديد مجدي البنداري

لازم تحددوا
بالشطة والا من غير شطة

بالكون والا من غير كمون

بالفلفل الآسمر والا من غير فلفل أسمر
بالليمون والا من غير ليمون
بالثوم والا من غير ثوم
بالبصل والا من غير بصل
بالطماطم والا من غير طماطم

بالزعتر والا من غير زعتر
بالزيت والا من غير زيت
بالسمن والا من غير سمن

بالملح والا من غير ملح
نضع ماء والا من غير ماء

بتحبوا عليه فول؟؟؟؟؟؟؟؟؟؟

أحسن حاجة؟

أحنا نسلق بيض وخلاص

أعمل لكم طريقة سلق البيض؟

هى ابتدت بفول وانتهت ببيض مسلوق
الحمد لله انها منتهتش بطريقه تسخين العيش على النار
ههههههههههههههههههههههههههههههه

طريقة تسخين العيش على النار قديمة

أقول لكم أنا بأعمل أيه دلوقتى

العيش بيتم تسخينة داخل فرن البوتجاز

أو نضعه على الدفاية

وانتظرونا فى حلقة أخرى

زائر

Admin كتب:: لازم تحددوا
بالشطة والا من غير شطة

بالكون والا من غير كمون

بالفلفل الآسمر والا من غير فلفل أسمر
بالليمون والا من غير ليمون
بالثوم والا من غير ثوم
بالبصل والا من غير بصل
بالطماطم والا من غير طماطم

بالزعتر والا من غير زعتر
بالزيت والا من غير زيت
بالسمن والا من غير سمن

بالملح والا من غير ملح
نضع ماء والا من غير ماء

بتحبوا عليه فول؟؟؟؟؟؟؟؟؟؟

أحسن حاجة؟

أحنا نسلق بيض وخلاص

أعمل لكم طريقة سلق البيض؟

يم يم يم ايه الروعة ده بس
لما حضرتك داخل تسالنا
امال انت حتعمل ايه
بيض مسلوق
يا حلااااااااااااااااااوة
لأ فعلا ده اللي كان ناقسنا و مش اتعلمناه.

[ندعوك للتسجيل في المنتدى أو التعريف بنفسك لمعاينة هذه الصورة]

استاذ مجدى صراحه مش عارفه من غير حضرتك كنا حنعمل ايه

انا بقالى سنين بحاول اعرف العيش بيتسخن ازاى

فعلا خدوا الخبره من اهل العلم

زائر

نورهان كتب:: هى ابتدت بفول وانتهت ببيض مسلوق
الحمد لله انها منتهتش بطريقه تسخين العيش على النار
ههههههههههههههههههههههههههههههه

يا بنتي اسمعي الكلام

ده مش حيبقي طلباتك اوامر كده
حيكون حاجة تانية
توكلي علي الله و ابداي لنا بالكشري
بس مش ي بتاع ابو طارق.ههههه

زائر

Admin كتب:: طريقة تسخين العيش على النار قديمة

أقول لكم أنا بأعمل أيه دلوقتى

العيش بيتم تسخينة داخل فرن البوتجاز

أو نضعه على الدفاية

وانتظرونا فى حلقة أخرى

لأ و فيه طريقة احدث من دول

لو متضايق حطه علي راسك دقيقة
حتلاقيه سخن علي طول
طبعا من الدم اللي بيغلي في نافوخك
و بالف هنا.

[ندعوك للتسجيل في المنتدى أو التعريف بنفسك لمعاينة هذه الصورة]

زائر

نورهان كتب:: [ندعوك للتسجيل في المنتدى أو التعريف بنفسك لمعاينة هذه الصورة]

استاذ مجدى صراحه مش عارفه من غير حضرتك كنا حنعمل ايه

انا بقالى سنين بحاول اعرف العيش بيتسخن ازاى

فعلا خدوا الخبره من اهل العلم

صراحة مش انتي لوحدك يا نورا

كلنا كنا تايهين لغاية
لما حطينا ايدينا علي اول السلم.

[ندعوك للتسجيل في المنتدى أو التعريف بنفسك لمعاينة هذه الصورة]

طريقه عمل الكشرى

طبعا مش حقول تسلقوا المكرونه ازاى دى من صعوبتها حيبقى ليها حلقه لوحدها ههههههههههههههه

اللى عايزه بس اقوله فى الرز انه لازم يستوى مع العدس لانه ده اللى بيديه طعم مميز جدا

المقادير:

3 كوب رز

1 ونص كوب عدس

كوب ونصف شعريه

كيلو مكرونه اصغر حجم او لو تحبيها اسباجيتى

مقادير الصلصه:

5 فصوص ثوم كبيره ومفرومه

5 او 6 حبات طماطم

وشطه حسب الرغبه

ملعقه كبيره خل

ملح وفلفل اسود

مقادير الدقه:

5 فصوص ثوم

2 ليمونه

خل ملح كمون

الشطه بقى خليها فى الاخر

نبدأ بسم الله :

نسلق المكرونه ونضعها جانبا
نسلق العدس نص سوا مش حنسلقه على الاخر لانه حيكمل سواه مع الرز
بعدين نجيب حله كبيره ونحمر فيها الشعريه وبعدين نحط عليها 4 كوب مياه وبعد ما تغلى نحط الرز والعدس بعد ما يتسلق نص سلق زى ما قلنا وبعد كده نغطى الحله ونسيبهم يستوا وكل شويه نقلب ونشوف
كده خلصنا من الكشرى الاساسى

ندخل على الصلصه
طبعا الغلط اللى كلنا بنعمله وتطلع الصلصه طعمها مش زى بتاعت بره اننا بنحط بصل وده غلط الثوم هو اللى بيخليها طبق الاصل زى بره وحتشوفى بنفسك بس ركزى معايا
حنجيب حله ونحط الثوم على النار مع زيت لحد ما يحمر
بعد كده نعصر الطماطم ونصبها عليه ونحط معلقه صلصه علشان تديها لون ونحط الملح والفلفل ونسيبها تغلى لمده 10 دقايق بالزبط
وبعدين نحط الخل بعد العشر دقايق نحطه ونخليها تغلى كمان 5 دقايق
واتحداكى لو مطلعتش زى بره واحسن

الدقه
نجيب طاسه ونحط فيها نقطه زيت نقطه بجد مش تعوميها زيت
وبعدين نفرم ال5 فصوص توم ونحطها فى الطاسه دقيقه بالزبط مع التقليب اوعى تسيبى التوم لحد ما يتحمر احنا حنحطه بس دقيقه وبعدين نحطله 2 فنجان خل ونعصر الليمون ونبهره بالملح والكمون ونخففهم بفنجان ميه ونطفى عليه بعد ما تاخد غلوه
وتصبيها فى ازازه وتسيبيها لحد ما التوم يرقد تحت
طبعا لو عايزه كميه اكبر بتحطى مثلا راس ثوم كامله وعليها 4 فنجان خل ونخففها بالمياه

الشطه
بسييطه جدا
حتجيبى حله وتحطى زيت
وبعد كده تجيبيى كبايه ميه كبيره وتدوبى فيها 4 ملاعق شطه
وحطيهم على الزيت فى الحله بس كترى الزيت شويه
ونسيبها تغلى على نار هاديه لمده 10 دقايق وممكن تقطعى معاها قرن فلفل احمر حراق

البصل او التقليه
حتقولولى هو ده كمان محتاج يا نورهان
حقولكم لانه ليه سر
حتجيبى البصل وتقطعيه طرنشات زى المعتاد
وبعدين نجيب دقيق فى كيس ونحط فيه البصل ونقعد نرجه وهو فى الكيس وبعد كده يتحمر فى زيت غزيييير
لانه لو زيت قليل الدقيق حيتعجن والبصله حتبوظ

انتهى الكشرى واى خدمه بس خبطوا على الباب وانا تحت امركم بلاش ترنوا الجرس بس علشان بتخض
هههههههههههههههههه

زائر

ايه الحلاوة ده

تسلم الايادي
بس نسيتي تقولي ازاي نسلق المكرونة هههههههههههه
صدقيني فيه ناس فعلا مش بتعرف
انا اول مرة اعمل فيها مكرونة حطيتها
قبل ما المية تغلي و طبعا ما اقولكيش علي الروعة
بس يومها سمعت كلام من بابا
طبعا كل شكر و تقدير.
شكرا لكي نورا
و لي عودة لطلب اخر إن شاء الله.

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]
ده كده كانت مكرونه محمره مش مسلوقه
انا تحت امرك حبييبتى لو عايزه اى حاجه تانيه
قولى بس تتكتب ليكى حالا

ما شاء الله عليكى نورهان يابخت زوجك واولادك بيكى
ربنا يديم عليكم السعادة ويخليكم لبعض حبيبتى
ما شاء الله عليكى ربنا يحميكى حبيبتى
لكى اهتمامات كثيرة ومتعددة ربنا يزيدك ويقدرك على مسؤلياتك ويوفقك الى ما يحبه ويرضاه
وبالمناسبة
انا عاوزة اعرف طريقة عمل الجمبرى
[ندعوك للتسجيل في المنتدى أو التعريف بنفسك لمعاينة هذه الصورة]

وفيه كمان شوربة الجميرى

لو عرفتيها
تبقى فعلا الشيفة نور

ربنا يكرمك عاشقه المدينه
والله انا مش لاقيه رد على الكلام الرائع ده غير انى اقول انا احبك جدا وربنا عالم
واتمنى ان اراكى
ومن عنيا حالا الجمبرى يكون مكتوب لعيونك حبيبتى

شوربه الجمبرى كمان حالا تبقى موجوده لحضرتك يا استاذ مجدى
من عيونى

الجمبرى المشوي

حتجيبى كيلو ونص جمبرى حجم متوسط بقشره طبعا

بصله متوسطه

فلفل اخضر رومى

كمون – فلفل اسود – ملح - شطه ( اختيارى )

نص فنجان صغير زيت

الطريقه:

حتغسلى الجمبرى بالدقيق والملح كويس وتقطعى راسه وبعدين حطيه فى صينيه وقطعى البصله مكعبات عليه والفلفل الرومى والبهارات والزيت حطى كله عليه وقلبى كويس فى بعضهم وبعدين غطيه بورق المونيوم وحطيه فى الفرن لمده 10 دقايق وبعدين ارفعيه فى الشوايه وهو متغلف برضه لمده 15 دقيقه كمان
الف هنا

الجمبرى فى الصينيه

كيلو جمبرى بقشره
بصله متوسطه
ملح وكمون
فلفل اخضر طرنشات
طماطمايه كبيره تقطع طرنشات
كوب مياه
الطريقه
نغسل الجمبرى بالدقيق كويس ونقطع راسه ونسيبه بقشره طبعا
نجيب صينيه متوسطه نحط الجمبرى ونقطع عليه البصل حلقات
والطماطم والفلفل ثم نضع الكمون والملح ونصب عليهم كوبايه ميه واحده بس ونقلبهم فى بعضهم ونحطه على البوتاجاز لمده ربع ساعه
ونغطى الصينيه كويس
الف هنا

الجمبرى المقلى
جمبرى متوسط بدون قشر
ملح وكمون وليمونه

الطريقه
نغسل الجمبرى جيدا ونتبله الاول بالكمون فقط لمده نص ساعه وبعدين نخرجه ونتبله تانى بالملح والكمون لمده 8 ساعات كده بييدى طعم وريحه خرافه
وبعد ما نطلعه نكون مجهزين بيضه ودقيق وبقسماط مطحون نخلطهم سوا الدقيق والبقسماط
نحط خليط الدقيق والبقسماط فى كيس سندوتشات
ونحط الجمبرى فى البيض وبعد كده نحطه فى الكيس اللى فيه البقسماط والدقيق وننفخه ونقعد نرج الجمبرى جواه
وبعدين نقليه فى زيت كتير
وبالف هنا