كتير مننا بيعانى من مشكله فتور الحياه بعد ما بييجوا الاولاد وبننشغل اوى عن ازواجنا وهما كمان بينشغلوا عنا جدا تعالى نعيد الحب الى حياتنا( ومتخليش جوزك يبص بره ) بلمسات بسيطه جدا
1- غيرى نبره صوتك خليها ناعمه شويه بلاش يحس انه قاعد مع درش صاحبه فى القهوه بلاش صوت عبد الفتاح القصرى ده خالص دلوقتى خليه لما ينزل سمعيه لعيالك بس.
2- على فكره فيه غلطه بيقع فيها كتير من ستاتنا ويرجعوا يقولوا اجوازنا اهملتنا وبصت بره اللى هى ايه انهم يقعدوا يقولوا كتير قدام اجوازهم احنا كبرنا خلاص الحاجات دى كانت ايام الصبا الالوان دى متنفعش اللى فى سنى وكل الكلام الفاضى ده انتى كده اللى بتجبريه يبص بره لا يا ناصحه خليكى طول عمرك عندك 20 سنه حتى ولو سنك تعدى ال 60 انتى لو حسستى نفسك بكده هو كمان حيحس بكده غيرى من استايل لبسك خالص يعنى انزلى السوق كده ونقى حاجات بنوته خالص فساتين قصيره ملونه شورتات وبديهات كت
3- لو عندك اولاد فى البيت صبيان يعنى وبتتكسفى منهم برضه ده مش مبرر انك تهملى فى نفسك مهو الراجل برضه ليه حق يشوفك فى احسن حال يعنى مثلا خلى الحاجات القيره اوى والعريانه بينك وبينه فى غرفه النوم وفى البيت قدام ولادك برضه البسى حاجات مدلعه بس حشمه يعنى بنطلون جينز عليه بدى او بجامه برمودا او فستان تحت الركبه بحاجه بسيطه بس يبقى شيك وكده يعنى لول تخينه وجسمك فيه عيوب البسى حاجات مدلعه بس واسعه بيبقى فيه موديلات كده وشيك اوى
4- غيرى برفانك اللى متعوده عليه ( برفان البصل والمحشى ) يعنى بلاش الراجل يجى من بره يبقى شامم من الستات بره احلى ريحه تغرى اى راجل ويجى بيته يلاقى بلاعه مستقبلاه على باب الشقه مهو لازم يطفش انا مش بقولك هاتى برفانات غاليه حتى لو تركيب بس نوعى هاتى كذا واحد عطور رقيقه مختلفه كل مره حطى نوع تغيير برضه.
5- شوفى ايه اللى بيلفت نظره بره او فى التليفزيون وقلديه يعنى مثلا لقيتيه بيبص على لبس ممثله او مغنيه الله يحرقهم هما اللى خاربين بيوتنا ماعلينا قدليهم فى مكياجهم لبسهم مش طبعا تروحى تشترى من محلات غاليه لا حاجت على الاد بس زى ما بيشوف بره البيت كمان خليه يشوف كل الحلاوه بس جوه البيت
6- غيرى لون شعرك كل فتره حسسيه انك فى جديد كل مره اعمليله نيو لوك يعنى
7- اعمليله مفجات كتير يعنى جيبيله هديه ولو بسييييطه اوى بدون مناسبه وحطيهاله جنب مخدته نيمى الوحوش اللى فى البيت واعمليله عشى رومانسى على الشموع ارقصوا سلو مع بعض وعلى فكره اكتر حاجه بتخنق الراجل انه يجى من براه يلاقى العيال لسه صاحيين والله مهما يعمل نفسه مش زعلان بيبقى من جواه حيطق نفسه تبقوا لوحدكم شويه من حقه برضه
8- بلاش تقابليه اول ما يدخل بسيول من الشكاوى شفت عيالم عملوا ايه شفت الوليه جارتنا عملت ايه وهببت ايه انسى شويه المواضيع دى بالله عليكى الراجل حيطفش
9- قابليه دايما على باب الشقه اول ما يدخل سيبى كل اللى فى ايدك واول ما يفتح الباب يلاقيكى فى وشه وانتى وحظك شلل بقى او جلطه اهو كله تساهيل بتاعت ربنا
وفى النهايه اتمنى ان كل واحده تنفذ اللى مكتوب وتدعيلى لانى والله تعبت اوى فى كتابته بس قلت لازم افيد كل حبايبى الستات اللى فى المنتدى الحبيب مع تحياتى نورهان
موضوع: اعملى نيولوك لحياتك 
السبت 12 ديسمبر 2009, 2:15 am