الجمبرى والكابوريا مشويين من مطبخى

عايزه تعملى جمبرى مشوى فى بيتك بدل ما تشويه بره تعالى نعمله سوا وعن تجربه والله تحفه اولا نبتدى بالجمبرى



حتجيبى كيلو ونص جمبرى حجم متوسط بقشره طبعا

بصله متوسطه

فلفل اخضر رومى

كمون – فلفل اسود – ملح - شطه ( اختيارى )

نص فنجان صغير زيت

الطريقه:

حتغسلى الجمبرى بالدقيق والملح كويس وتقطعى راسه وبعدين حطيه فى صينيه وقطعى البصله مكعبات عليه والفلفل الرومى والبهارات والزيت حطى كله عليه وقلبى كويس فى بعضهم وبعدين غطيه بورق المونيوم وحطيه فى الفرن لمده 10 دقايق وبعدين ارفعيه فى الشوايه وهو متغلف برضه لمده 15 دقيقه كمان



حتلاقى وانتى بتطلعيه من الفرن للشوايه نزل منه شوربه صفيها منه وخليها على جنب علشان حنحتاجها







تعالى بقى نشوف الكابوريا :

برضه حنغسلها بالدقيق والملح وحنجيب نفس بهارات الجمبرى البصل والزيت والملح والكمون والفلفل

وبعدين حطى الكابوريا فى حله وحطى عليها كل البهارات دى ومن غير نقطه ميه وبعدين اقفلى الحله عليها كويس واقعدى كل دقيقه كده قلبى الكابوريا وانتى قافله الحله يعنى امسكى الحله بفوطه المطبخ وااقعدى رجيها علشان الكابوريا تتقلب جوه وبعد 5 دقايق كده افتحى عليها الغطا وصبى فوقيها شوربه الجمبرى اللى قلنا حنخليها على جنب واقفلى الغطا تانى وكررى عمليه التقليب دى لمده 3 دقايق واطفى عليها وبالف هنا وشفا



ملحوظه : طبعا الكابوريا الانثى احلى من الذكر طيب ازاى تعرفى انها انثى او ذكر اقولك : اقلبى الكابوريا على ضهرها حتلاقى فتحه الاخراج بتاعتها لو لقيتيها بيضاويه الشكل تبقى انثى ولو مثلثه الشكل بطريقه واضحه تبقى ذكر واى خدمه

انا على فكره كل ما اخش المنتدى اليومين دول اجوع قوي

الف شكر على الطريقه وان شاء الله اخلي مراتي تجربها
تسلم ايدك على الموضوع

الله يسلمك وشكرا وفي انتظار اكلات غريبه كتير

انا بحب الاكلات اللى تتجرب وجديده الواحد دايما يمل من المعتاد

وكل اكله وانتي طيبه

وصفة جميلة وسهلة تسلم ايدك يانورهان
وعلى فكرة عاوزة اقول لكى طبعا لازم
الانثى طعمها يكون احلى [ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة] والله انتى جميلة وانا بحب كل ال بتكتبيه
شكرا لك من القلب نورهان